ካብ መጽሓፍ ቅዱስ ዝተኣገደ መጽሓፈ ሄኖክ ብዛዕባ መንግስተ ሰማይ ዝብሎ ዘሰንብድ ምስክርነት.

ቅድሚ ነዊሕ እዋን፥ ዓቢ ማይ ኣይሂ ናብ ምድሪ ከይመጸ፡ ፍርዲ እቲ ልዑል ፈጣሪ ኣብ ልዕሊ ደቂ ሰባት ከይወደቐ፡ ብኣምላኽ ዝተመርጸ ጻድቕ ሰብ ይነብር ነበረ።  ስሙ ሄኖክ ወዲ ያሬድ ይበሃል።  ለባምን ውሕሉልን እዩ ነይሩ፡ እግዚኣብሄር ድማ ብሞገስ ይጥምቶ ነበረ።  ኣምላኽ ንሄኖክ ምስጢራት ሰማይ ክርኢ ፈቒድሉ እዩ።  ናይቲ ዝለዓለ መሕደሪ እግዚኣብሔርን ናይቲ ዓብን ዘይልወጥን መንግስቲ ኣምላኽን ምስክር ክኸውን ክኢሉ እዩ።

ሄኖክ ንመደበራት መላእኽቲ ብብዙሕ ኣዒንቲ ርእይወን እዩ። ብርሃን እዘን መደበራት ካብ ጸሓይ ንላዕሊ ዝደምቕ እዩ ነይሩ።  እቲ ማንም ክቐርቦ ዘይክእል ዝፋን እግዚኣብሄር፥ መወዳእታ ዘይብሉ ብርሃን ክበርህ ረኣየ።  ስርዓት ፍጥረት፡ መልክዕ ሰማያውያን ፍጡራት፡ መዝሙር ኪሩቤል፡ ከምኡ’ውን ሰብ ርእይዎ ዘይፈልጥ ክብሪ ረኣየ።  ሄኖክ ድሒሩ ነቲ ዝረኣዮ ኣብ ካልኣይ መጽሓፍ ሄኖክ (Second Book of Enoch) መዝጊብዎ እዩ፣ ኣብኡ ድማ ብዛዕባ ዓሰርተ ሰማያት ተዛሪቡ።

ሄኖክ ከምዚ ኢሉ፤

ወዲ 165 ዓመት ከለኹ፡ ማቱሳላ (Methuselah) ዝተባህለ ወዲ ወለድኩ። ብድሕሪ እዚ፥ ንተወሳኺ 200 ዓመት ብህይወት ጸኒሐ። ብድምር፥ ጠቕላላ ዓመታት ህይወተይ 365 እዩ። ኣብታ ቀዳመይቲ መዓልቲ ናይታ ወርሒ፥ ኣብ ገዛይ ንኸዕርፍ፡ ኣብ ዓራተይ ተደፊአ ነይረ፡ ጸኒሑ ድማ ድቃስ ወሰደኒ። ደቂሰ ከለኹ፥ ኣብ ልበይ ረበሻ ተሰምዓኒ። ኣብ ሕልመይ በኸኹ፡ ነቲ ምኽንያት ናይ ሓዘነይ ወይ እንታይ ከምዝኾንኩ ግን ክርድኣኒ ኣይከኣልኩን።

ሽዑ ክልተ ሰባት ተራእዩኒ።  ኣብ ምድሪ ካብ ዝረኣኹዎም ሰባት ዝዓበዩ እዮም ነይሮም።  ገጾም ከም ጸሓይ ይበርቕ ነበረ፡ ኣዒንቶም ድማ ከም ሓዊ ይነዳ ነበራ።  ካብ ከንፈሮም እውን ሓዊ ይወጽ ነበረ።  ክዳውንቶም ሓምላይ፡ ኣኽናፎም ካብ ወርቂ ንላዕሊ ዝበርህ፡ ኣእዳዎም ድማ ካብ በረድ ዝጽዕዱ እዩ ነይሩ።  ኣብ ርእሲ ዓራተይ ደው ኢሎም ብስመይ ጸውዑኒ።

ካብ ድቃሰይ ተበራቢረ ብንጹር ረኣኽዎም።  ሰላም ኢለዮም ግን ፈሪሐ ነይረ፡ ብሰንኪ ፍርሒ ገጸይ ተቐየረ።  ሽዑ ሓደ ካብኦም፡ ‘ሄኖክ ኣይትፍራሕ።  ትብዓት ይሃልኻ።  እቲ ዘለኣለማዊ ኣምላኽ እዩ ናባኻ ልኢኽና።  ሎሚ ምሳና ናብ ሰማይ ክትድይብ ኢኻ።  ንደቅኻን ንቤተሰብካን፥ ንስኻ ምስ ከድካ ኣብ ምድሪ እንታይ ክገብሩ ከም ዘለዎም ንገሮም።  እግዚኣብሄር ናብኣታቶም ክሳዕ ዝመልሰካ፥ ሓደ እኳ ዝደልየካ ክህሉ የብሉን’ ኢሉ ተዛረበኒ።

ቀልጢፈ ድማ ተኣዘዝኩ።  ካብ ገዛይ ወጺአ፥ ንደቀይ ማቱሳላ (Methuselah): ረጂምን (Regim) ጋይዳድን (Gaidad) ጸዋዕክዎም።  እቶም ሰባት ዝበልዎ ኩሉ ነገርክዎም።  ኣነ ድማ ንደቀይ ከምዚ በልክዎም፡ ‘ደቀይ ስምዑኒ።  ናበይ ከም ዝኸይድን እንታይ ከም ዘጋጥመኒን ኣይፈልጥን እየ።  ኣነ ግና እዚ እብለኩም ኣሎኹ፡ ካብ ኣምላኽ ኣይትርሓቁ።  ንሰማይን ምድርን ዘይፈጠሩ ዋጋ ዘይብሎም ፍጡራት ኣይትስዓብዎም፣ ንሳቶም ክጠፍኡ እዮም፣ እቶም ዘምልኹዎም እውን ከምኡ።  እግዚኣብሄር ንኽትፈርህዎ ድልዱል ልቢ ይሃበኩም።  ሕጂ ድማ ደቀይ እግዚኣብሄር ናባኻትኩም ክሳዕ ዝመልሰኒ ሓደ እኳ ክረኽበኒ ኣይፈትን።’

ምስ ደቀይ ምዝራብ ምስ ወዳእኩ፥ እቶም መላእኽቲ ወሰዱኒ።  ብኣኽናፎም ተሰኪሞም ኣብ ደበናታት ቀዳመይቲ ሰማይ ኣቐመጡኒ።  ኣብኡ ንኸባብየይ ምስጠመትኩ፥ ካብ ባሕርታት ምድሪ ዝዓቢ ዓቢ ባሕሪ ረኣኹ።  እቶም መላእኽቲ ንገዛእቲ ከዋኽብትን ተራኦም ኣብ ሰማያትን ኣርኣዩኒ።  ንከዋኽብቲ ብኣኽናፎም እናነፈሩን ኣብ መንገዶም እናተንቀሳቐሱን ዝመርሑ 200 መላእኽቲ ኣርእዮምኒ።

ጸኒሐ፥ ነተን ብመላእኽቲ ዝሕለዋ መኽዘናት በረድ ረኣኹ።  ደበናታት ረኣኹ፡ ከምኡ’ውን በየን ቦታ ከምዝወጹን ዝኣትዉን ርእየ።  ከም ዘይቲ ኣውሊዕ ዝደምቕን ሕብሪ ኩሉ ዕምባባታት ምድሪ ዘለዎን መኽዘን በረኸት (storehouse of the dew) ረኣኹ።  ብዙሓት መላእኽቲ ነዚ መኽዘን ኣብ ዝተመደበሉ ግዜ እናኸፈቱን እናዓጸዉን ይሕልውዎ ነበሩ።

ሽዑ፥ መላእኽቲ ናብ ካልእ መንግሰተ ሰማይ ወሰዱኒ።  ኣብኡ ድማ ካብ ዝኾነ ኣብ ምድሪ ዝነበረ ዝዓቢ ጸልማት ረኣኹ።  እሱራት ተንጠልጢሎም፡ ነቲ ዓቢ ፍርዲ ክጽበዩ ረኣኹ።  እዚኣቶም ካብ ኣምላኽ ዝረሓቑ መላእኽቲ እዮም ነይሮም።  ትእዛዛቱ ኣይተኣዘዙን፥ የግዳስ ንፍቓዶምን ነቲ ኣብ ሓምሻይ መንግስተ ሰማይ ተኣሲሩ ዝነበረ መስፍንን ዝኽተሉ እዮም ነይሮም።  ምስ ረኣኽዎም ድማ ኣዝየ ደንጊጸ።  ንሳቶም ድማ፡ ‘ናይ ኣምላኽ ሰብ፡ ምእንታና ጸልዩ’ በሉኒ። ኣነ ግና ‘ኣነ እውን መዋቲ ሰብ እየ።  ከመይ ጌረ እየ ብዛዕባ መላእኽቲ ክጽሊ?  ናበይ ከም ዝኸይድ ወይ እንታይ ከም ዘጋጥመኒ፡ ወይ መን ከም ዝጽልየለይ ኣይፈልጥን እየ’ ኢለ መለስክሎም።

ብምቕጻል፥ እቶም መላእኽቲ ናብ መበል ሳልሳይ መንግስተ ሰማይ ወሰዱኒ።  ኣብኡ ድማ ዓቢ ጽባቐ ዘለዎ ቦታ ረኣኹ።  ጥዑም ዕምባባታትን ፍረታትን ዘለዎም ኣግራብ ርእየ። እቲ ኣብኡ ዝረኣኽዎ፥ ካብ ዝኾነ ኣብ ምድሪ ዘሎ ዝበልጽ እዩ።  ኣብ ማእከል እቶም ኣግራብ፥ ኦም ህይወት (Tree of Life) ነበረት። እዛ ኦም፥ ጎይታ ናብ ገነት ምስ ኣተወ ዘዕረፈላ እያ።  እታ ገረብ ኣዝያ ፍልይቲ እያ ነይራ።  ከም ወርቂ (gold)፣ ቨርሚልዮንን (vermilion) ሓውን (fire) ትደምቕ ነበረት።  ኵሉ ዓይነት ፍረ ይፈሪ ነበረ፣ ሱራ ድማ ኣብቲ ኣብ ጫፍ ምድሪ ዝነበረ ጅርዲን ነበረ።  ገነት ንባዕላ ኣብ መንጎ ዝበላሸዉን ዘይበላሸዉን እዩ ነይሩ።

ካብታ ቦታ እቲኣ ክልተ ማይ (springs) ወጸ፡ እቲ ሓደ መዓርን ጸባን፡ እቲ ካልኣይ ዘይትን ወይንን እዩ።  ናብ ኣርባዕተ ሩባ ተፈላለዩ፡ ሽዑ ናብ ገነት ኤደን ፈሰሱ፡ ካብኡ ድማ ናብ ስግር ምድሪ ይውሕዙ ነበሩ።  ኣብዚ ቦታ እዚ፡ ነፍሲ ወከፍ ኦም ፍረ ኣውጽአ፡ ነፍሲ ወከፍ ክፍሊ ድማ ተባረኸ።  ሰለስተ ሚእቲ  መላእኽቲ ነቲ ኣታኽልቲ ይሕልውዎ ነበሩ።  ብዘይ ምቁራጽ ይዝምሩን ኩሉ ግዜ ንጎይታ የገልግሉን ነበሩ።

ኣነ ድማ፡ ‘እዚ ቦታ ክንደይ ይጥዕም እዩ!’ በልኩ። እቶም መላእኽቲ ድማ፡ ‘ሄኖክ እዚ ቦታ ንጻድቃናት ዝተዳለወ እዩ። ማለት፥ ነቶም እናተሳቐዩ ኣብ እምነቶም ዝጸንዑ፡ ካብ ክፍኣት ዝርሕቑ፡ ብፍትሒ ዝፈርዱ፡ ንዝጠመዩ ዝምግቡ፡ ንዕሩቃት ዝለብሱ፡ ንዝወደቑ ዘልዕሉ፡ ንዘኽታማት ዝከናኸኑ፡ ኣብ ቅድሚ እግዚኣብሄር ብዘይ ወቐሳ ዝመላለሱ ሰባት ዝተዳለወ እዩ።  ንዓኣቶም እዚ ቦታ ከም ዘለኣለማዊ ውርሻ ተዓቂቡሎም ኣሎ’ ኢሎም መለሱለይ።

ሽዑ መላእኽቲ ነቲ ሰሜናዊ ሸነኽ ኣርኣዩኒ።  ኣብኡ ድማ ናይ ራዕዲ ቦታ ረኣኹ።  መቕጻዕትን ሕሱም ጸልማትን ዝመልአ እዩ ነይሩ።  ብርሃን ኣይነበረን፡ ዝነድድ ሓዊ ጥራይ እዩ ነይሩ።  ኣብኡ ድማ ሩባ ሓዊ ይውሕዝ ነበረ።  ብምሉኡ እቲ ቦታ ብሃልሃልታ ሓዊ፣ ውርጪን በረድን መሊኡ ነበረ።  እቲ ኣየር ብጽምእን ዘንቀጥቀጥ ቁሪን መሪሩ ነበረ።  እቲ ማእሰርቲ ኣዝዩ ከቢድ እዩ ነይሩ፣ እቶም ኣብኡ ዝነበሩ መላእኽቲ ድማ ምሕረት ዝፈልጡ ኣይኮኑን ነይሮም፥ ስለዚ ድማ ኣጽዋር ቍጥዓ ተሰኪሞም መወዳእታ ዘይብሉ ስቅያት የውርዱ ነበሩ።

ኣነ ድማ: ‘እዚ ቦታ ክንደይ ይኸፍእ እዩ!’ በልኩ።

እቶም ሰባት ከምዚ ኢሎም መለሱ፦ ‘ሄኖክ፥ እዚ ቦታ ነቶም ንኣምላኽ ዘሕስሩ ዝተዳለወ እዩ። ኣብ ልዕሊ ተፈጥሮ ሓጢኣት ንዝፍጽሙ፣ ንህጻናት ዘበላሽዉ፣ ስሕተትን ጥንቆላን ንዝገብሩ ሰባት እዩ። ነቶም ብሓጢኣቶም ዝምክሑ፣ ኣብ ካልኦት ጉድኣት ዘውርዱ፣ ቅንእን ጽልእን ዝዝርግሑ፣ ከምኡ’ውን ጾታዊ ርኽሰትን ቅትለትን ንዝፍጽሙ ሰባት ዝተዳለወ እዩ። ብተወሳኺ፥ ነቶም ርጉማትን ንነፍሲ ካልኦት ዘራኽሱን፥ ነቶም ንድኻታት ዘይሕግዙ፥ ነቶም ብጻዕሪ ናይ ካልኦት ዝህብትሙ ሰባት ዝተዳለወ ቦታ እዩ።

ብሓፈሻ፥ ነቶም መግቢ እናሃለዎም ንጥሙያት ዘይዕንግሉ፡ ነቶም ብዙሕ ክዳውንቲ እናሃለዎም ግን ንዕርቃኖም ዝወጹ ሰባት ዘይከድኑ ስሱዓት ዝእክብ ቦታ እዩ።  ነቶም ፈጣሪኦም ዘይፈልጡ፡ ግን ከኣ ንዘይርእዩ፣ ክሰምዑን ንዘይክእሉን ህይወት ንዘይብሎምን ጣኦታት ዝሰግዱ ዓያሹ ሰባት ኢዩ።  ኣምልኾ ደቂ-ሰባት ኣብ ሰብ-ዝሰረሖም ጣኦታትን ሓወልትን ክኸውን የብሉን።  ነዞም ኩሎም ክንገልጾም ዝጸናሕና፥ እዚ ቦታ እዚ ከም ዘለኣለማዊ ርስቶም ተዳልዩ ኣሎ።’

ብድሕሪ እዚ እቶም መላእኽቲ ናብ ራብዓይ መንግስተ-ሰማይ ወሰዱኒ።  ኣብኡ፥ መንገዲ ጸሓይን ወርሕን ርእየ፥ ምንቅስቓሶም ዓቂነ፥ ንብርሃናቶም ድማ ኣነጻጺረ።  ብርሃን ጸሓይ ካብ ብርሃን ወርሒ ይዓቢ ነበረ።  ጸሓይ ከም ንፋስ ብዘደንቕ ፍጥነት ትንቀሳቐሰ ነበረት።  ለይትን መዓልትን ካብ ምንቅስቓስ ፈጺማ የዕሪፋ ኣይትፈልጥን።

ጸሓይ ብኣርባዕተ ዓበይቲ ከዋኽብቲ ተሰንያ ነበረት፣ ነፍሲ ወከፎም ድማ ኣብ ትሕቲኦሞ ሽሕ ከዋኽብቲ ነበሮም።  ኣርባዕተ ከዋኽብቲ ብየማን መንኰርኰር ጸሓይ፡ ኣርባዕተ ከዋኽብቲ ድማ ብጸጋም ነበሩ።  ብድምር ሸሞንተ ሽሕ ከዋኽብቲ ምስ ጸሓይ ይንቀሳቐሱ ነበሩ።  ዓሰርተ ሓሙሽተ ሽሕ መላእኽቲ ብመዓልቲ ንጸሓይ የገልግሉ ነበሩ፣ ብለይቲ ድማ ሽዱሽተ-ክንፊ ዘለዎም ሓደ ሽሕ መላእኽቲ ቀዲሞም ናብ ሃልሃልታ ይኣትዉ ነበሩ።  ሚእቲ መላእኽቲ፥ ጸሓይ ብርሃን ከምትህብ ይገብሩ ነበሩ።

ካልኦት ፍጥረታት ጸሓይ እውን ርእየ እየ።  ስሞም ፊኒክስን (Phoenixes) ቻልኪድሪን (Chalkidri) ይበሃል።  ኣዝዮም ብሉጻትን ፍሉያትን እዮም ነይሮም።  ኣእጋሮምን ጭራኦምን ከም ናይ ኣንበሳ፡ ርእሶም ድማ ከም ናይ ሓራግጽ ነበረ።  ኣካላቶም ከም ቀስተ ደመና ይደምቕ ነበረ።  ስፍሓቶም ኣዝዩ ዓቢ እዩ ነይሩ፣ ማለት ብትሽዓተ ሚእቲ መለክዒ ዝዕቀን እዩ ነይሩ።  ከም መላእኽቲ ኣኽናፍ ነበሮም፡ ነፍሲ ወከፎም ድማ ዓሰርተው ክልተ ነበሩ።  ከምቲ እግዚኣብሔር ዝኣዘዞ፥ ዋዒን በረኸትን (dew) ተሰኪሞም ንጸሓይ የሰንዩ ነበሩ።

ጸሓይ ብትሕቲ ሰማያት እናሓለፈት ምስ ጩራታታ ብርሃን ኣብ ትሕቲ ምድሪ ትዓርብ ነበረት።  እቶም መላእኽቲ ናብ ምብራቕ፡ ናብ ኣፍ ደገ ጸሓይ ወሰዱኒ።  ኣብኡ ድማ ጸሓይ ከከም ወቕትን ኣዋርሕን ዓመትን፥ ከምኡ’ውን ከከም ሰዓታት መዓልትን ለይትን እትበርቀሉን ሽዱሽተ ኣፍ ደገ ርእየ።  ነፍሲ ወከፍ ኣፍደገ ስሳን ሓደን ስታድያ (stadia) ስፍሓትን ናይ ርብዒ ስታድዩም ዝያዳ ዓቐንን ነበሮ።  ምስ ዓቀንክዎም፥ ነቲ ልክዕ ዓቐኖም ክፈልጥ ከኣልኩ።

በዚ ኣፍደገታት እዚ ጸሓይ ትበርቕን ንምዕራብ ትኸይድን፣ ድሕሪኡ ከከም መስርዓት ናይ ወቕትታት ብሽዱሽተ ኣፍደገታት ኣቢላ መሊሳ ንድሕሪት ትምለስ።  ብኸምዚ ኣገባብ እቶም ኣርባዕተ ወቕትታት ምስ ተመልሱ፥ ሓደ ዓመት ይዛዝም።

ቀጺሎም እቶም መላእኽቲ ናብ ምዕራብ መርሑኒ።  ኣብኡ ድማ ጸሓይ እትዓርበሉ ሽዱሽተ ኣፍደገታት ረኣኹ፣ እዚ ኸኣ ምስ ኣፍደገታት ምብራቕ ዚሰማማዕ እዩ።  ጸሓይ በዘን ኣፍደገታት እዚኣተን ኣቢላ ን365ን ሓደ ርብዒን መዓልታት ትዓርብ።  ጸሓይ ምስ ዓረበት ድማ ካብ ትሕቲ መሬት ናብ ምድሪ ብርሃና ትህብ።  እቲ ናይ ብርሃን ዘውዲ ኣብ ሰማይ ምስ እግዚኣብሄር እዩ ዝተርፍ።  ጸሓይ ኣብ ትሕቲ ምድሪ ብመንኮርኮራ ክትጓዓዝ እንከላ ኣርባዕተ ሚእቲ መላእኽቲ ይሕልውዋ።

ለይቲ፥ ጸሓይ ኣብ ትሕቲ ምድሪ ሸውዓተ ዓበይቲ ሰዓታት እያ እተሕልፍ።  ኣብ ሻሙናይ ሰዓት ድማ ናብ ምብራቕ ቀሪባ ብርሃና ናብ ምድሪ ትሰድድ።  ሽዑ ጸሓይ ካብ ሓዊ ንላዕሊ ትበርህ።  ኣብዚ ህሞት እዚ ፎኒክስን ቻልኪድሪን ናብ መዝሙር ይኣትዉ።  ነፍሲ ወከፍ ኣዕዋፍ በቲ ብርሃን እናተሓጎሳ ንመንገብገበን የንቀሳቕሳ።  ስለዚ፥ ብትእዛዝ እግዚኣብሄር ከምዚ እናበሉ ይዝምሩ፥

‘ወሃቢ ብርሃን ንዓለም ድምቀት ንምምጻእ እዩ ዝትንስእ።  ንግሆ ቅርጺ ይሕዝ፡ ጩራታት ጸሓይ ይቕልቀል፡ ጸሓይ ድማ ንኹሉ ክፋል ናይ ዓለም ከተብርህ ትበርቕ።’

እቶም መላእኽቲ ንቅማረ ምንቅስቓስ ጸሓይን እትሓልፈሉ ኣፍደገታትን ኣርእዮምኒ።  እዚኦም እቶም ንሰዓታት ናይ ሓደ ዓመት ዝዕቅኑ ዓበይቲ ኣፍደገታት እዮም።  በዚ ምኽንያት ድማ ዑደት ጸሓይ ኣብ ነፍስ ወከፍ 28 ዓመት ዘብቅዕ እዩ።

እቶም መላእኽቲ ንመንገዲ ወርሒ እውን ኣርእዮምኒ እዮም።  ካብ ምዕራብ ክሳብ ምብራቕ ዓሰርተው ክልተ ኣፍደገታት ኣለዋ።  በዚ ኣፍደገታት እዚ ወርሒ ኣብ ዝተመደበላ ሰዓት ትኣቱን ትወጽእን።

ኣብ ቀዳማይ ኣፍደገ ን31 መዓልታት ትጸንሕ።

ኣብ ካልኣይ ኣፍደገ፥ 31 መዓልቲ።

ኣብ ሳልሳይ ኣፍደገ፥ 30 መዓልቲ።

ኣብ ራብዓይ ኣፍደገ፡ 30 መዓልቲ።

ኣብ ሓምሻይ ኣፍደገ፡ 31 መዓልቲ።

ኣብ ሻድሻይ ኣፍደገ፡ 31 መዓልቲ።

ኣብ ሻብዓይ ኣፍደገ፡ 30 መዓልቲ።

ኣብ ሻሙናይ ኣፍደገ፡ 31 መዓልቲ።

ኣብ ታሽዓይ ኣፍደገ፡ 31 መዓልቲ።

ኣብ ዓስራይ ኣፍደገ፡ 30 መዓልቲ።

ኣብ መበል ዓሰርተ ሓደ ኣፍደገ፡ 31 መዓልቲ።

ኣብ መበል ዓሰርተው ክልተ ኣፍደገ፡ 28 መዓልቲ።

ወርሒ እውን ንብዝሒ ምብራቓዊ ኣፍደገታት ተኸቲላ ብናይ ምዕራባዊ ኣፍደገታት ትሓልፍ።  በዚ ኸምዚ ድማ ወርሒ መስመራ ትውድእ።  ጸሓያዊ ዓመት 365ን ርብዒ መዓልትን ክኸውን ከሎ፡ ወርሓዊ ዓመት ድማ 354 መዓልታት እዩ።  ስለዚ፥ ወርሒ ካብ ጸሓያዊ ዓመት ብዓሰርተው ክልተ መዓልቲ ይሓጽር።  እዘን ዝጠፍኣ መዓልታት ‘epacts of the year’ ይበሃላ።

እቲ ዓቢ ዑደት ናይ ግዜ፥ 532 ዓመት ዝሓዘ እዩ።  ኣብዚ ስርዓት እዚ እቲ ናይ ሓደ ርብዒ መዓልቲ ንሰለስተ ዓመት ኣይቁጸርን እዩ፥ ኣብ ራብዓይ ዓመት ግን ከም ሓደ ምሉእ መዓልቲ ይውሰድ።  እዚ ምትዕርራይ እዚ ንዓመት ምሉእ ይገብሮ።  በዚ ምኽንያት ድማ ጸሓይን ወርሕን ብመሰረት መለኮታዊ ስርዓት ኣዋርሕን ወቕትታትን ይንቀሳቐሳ።

ጸሓይ ብናይ ምብራቓውን ምዕራባውን ኣፍደገታት ትሓልፍ፣ ስለዚ ድማ ለይትን መዓልትን ብዓቢ ፍጥነት ይሓልፍ።  ካብ ንፋሳት፣ መናፍስትን (spirits) መላእኽትን ዝቐልጠፈ እዩ።  ነፍሲ ወከፍ መልኣኽ ሽዱሽተ ክንፊ ኣለዎ።  ጸሓይ ንመገዳ ብዑደት እያ ትዛዝሞ፣ ምንቅስቓሳ ድማ ብጥንቃቐ ይዕቀን።

ኣብ ማእከል እቲ ሰማያት፥ ወተሃደራት ብርሃን ንጐይታ ከገልግሉ ረኣኹ።  መሳርሒ ሙዚቃ እናተጻወቱን ጥዑምን ፍሉይን ብዝኾነ ድምጺ እናዘመሩን ምስጋናኦም ንኣምላኽ የብጽሑ ነበሩ።  መዝሙሮም ኣዝዩ መሲጡኒ ነይሩ።

ሽዑ፥ ናብ መበል ሓምሻይ መንግስተ ሰማይ ተወሰድኩ።  ኣብኡ ድማ ግሪጎሪ (Grigori) ዝበሃሉ ማእለያ ዘይብሎም ወተሃደራት ረኣኹ።  ደቂ ተባዕትዮ ዝመስሉን ግን ካብ ንጉዓት (giants) ዝገዝፉን እዮም ነይሮም።  ገጾም ጸልሚቱን ናይ ሓዘን ስምዒት ዘንጸባርቕን እዩ ነይሩ፡ ኣፎም ድማ ስቕ ኢሉ ነበረ።  ‘እዚ ንምንታይ ከምኡ ኮይኑ’ ኢለ ሓተትኩ።  እቶም ምሳይ ዝነበሩ መላእኽቲ፥ “እዚኦም፥ ንጐይታ ብርሃን ዝነጸጉ ግሪጎሪ እዮም። መራሒኦም ሳጥናኤል ይብሃል ነበረ። ገሊኦም ናብ ምድሪ ወሪዶም መብጽዓኦም ኣፍሪሶም፥ ምስ ኣንስቲ ደቂ-ሰባት ድማ ተዋሲቦም። ካብ ተግባሮም ድማ ዓቢ ክፍኣትን ጎነጽ ዘዘውትሩ ንጉዓትን መጺኡ።ብሰንኪ እዚ እግዚኣብሔር ብኸቢድ መቕጻዕቲ ፈረዶም። ክሳብ እታ ናይ መወዳእታ መዓልቲ ኣብ ጸልማት ክጸንሑ እዮም።’

ምስቶም ግሪጎሪ ተዛራሪበ እየ፡ ናዕቦም ሓዘን ከም ዘምጽአ ድማ ኣዘኻኺረዮም።  ንቃለይ ሰምዑ፡ ሽዑ ድምጺ መለኸት (trumpets) ተሰምዐ።  ግሪጎሪ ብሓደ ድምጺ ብሓባር ክደርፉ ጀመሩ።  መዝሙሮም፥ ብጓሂ ኣብ ቅድሚ እግዚኣብሄር ቀረበ።

ብድሕሪ እዚ ናብ ሻድሻይ መንግስተ-ሰማይ ተወሰድኩ።  ኣብኡ ድማ ሸውዓተ ጕጅለ መላእኽቲ ረኣኹ።  ገጾም ከም ጸሓይ ይበርህ ነበረ፣ ብመልክዕን ኣከዳድናን ድማ ይመሳሰሉ ነበሩ። እዞም መላእኽቲ ንስርዓት ከዋኽብቲ፣ ምንቅስቓስ ወርሒ፣ መንገዲ ጸሓይን ስኒት ዓለምን ዝፈልጡ እዮም ነይሮም።  ክፉእ ምስ ረኣዩ ድማ ኣንጻሩ ትእዛዛትን መምርሕን ሂቦም።  ብመዝሙር ምስጋና ድማ ንእግዚኣብሄር የገልግሉ።

እዚኦም፥ እቶም ሊቃነ መላእኽቲ (archangels) እዮም ነይሮም።  ገሊኦም ኣብ ልዕሊ ወቕትታትን ዓመታትን ዝተቐመጡ እዮም፥ ማለት ንመስርሓት ናይ ወቕትታትን ዓመታትን ዝቆጻጸሩ እዮም ነይሮም።  ገሊኦም ኣብ ልዕሊ ሩባታትን ባሕርታትን ተቐሚጦም ነበሩ።  ገሊኦም ኣብ ልዕሊ ፍረ ናይ ምድርን ንህያዋን-ነገራት (living things) መግቢ ዝህብ ኩሉ ዓይነት ሳዕርን ተቐሚጦም ነበሩ።  ካልኦት ድማ ንህይወትን ተግባርን ኩሎም ሰባት ይምዝግቡ ነይሮም።  ኣብ ዙርያኦም፥ ፊኒክስ፣ ኪሩቤልን ካልኦት ክንፊ ዝነበሮም ፍጡራትን ነበሩ። ኩሎም ብሓባር መወዳእታ ዘይብሉ ውዳሴ ይዝምሩ ነበሩ።

ሽዑ ናብ ሻብዓይ ሰማይ ተወሰድኩ።  ኣብኡ ድማ ዓቢ ብርሃንን ሰራዊት ላዕለዎት መላእኽትን ረኣኹ: ማለት ሊቃነ መላእኽቲ: ገዛእቲ (dominions): ሓይልታት: ኪሩቤል: ሱራፌል: ዝፋናት: ከምኡውን ብዙሓት ዓይኒ ዘለዎም ፍጡራት።  ቁጽሮም ክትፈልጦ ዝከኣል ኣይነበረን።  ብፍርሒ ተንቀጥቀጥኩ።  እቶም ምሳይ ዝነበሩ መላእኽቲ ግና ‘ሄኖክ ኣይትፍራሕ’ በሉኒ።

ካብ ርሑቕ ንጐይታ ኣብቲ ልዑል ዝፋኑ ሪአዮ።  ኣብ ዙርያኡ፥ ሰማያውያን ሰራዊት ብመስርዕ ደው ኢሎም እናሰገዱን እናዘመሩን ረኣኹ።  ብዙሓት ኣኽናፍን ብዙሕ ዓይንን ዘለዎም ኪሩቤልን ሱራፌልን ካብ ጎድኒ ዝፋን ኣምላኽ ፈጺሞም ኣይተኣለዩን።  “እግዚኣብሄር፥ ቅዱስ ቅዱስ ቅዱስ እዩ። ሰማይን ምድርን ብጸጋታቱ ዝተባረኹ እዮም” እናበሉ ድማ ይጭድሩ ነይሮም።

ሽዑ፥ ናብ ላዕሊ፡ ናብታ ሙዛሎት (Muzaloth) እትበሃል ሻሙነይቲ መንግስተ-ሰማይ ተወሰድኩ።  ወቕትታትን ኮኾባትን ዝቕመጡሉ ቦታ እዩ።  ድሕሪኡ ናብቲ ኣባይቲ ኮኾባት ዚቕመጠሉ ኩቻቪም (Kuchavim) ዝብሃል ታሽዓይ ሰማይ ተወሰድኩ።  ኣብ መወዳእታ ናብታ ኣራቮት (Aravoth) እትብሃል ዓስረይቲ ሰማይ ተወሰድኩ፣ እዚኣ ኸኣ ካብ ኵላቶም ዝለዓለት ሰማይ እያ ነይራ።

ኣብኡ ድማ ገጽ እግዚኣብሄር ረኣኹ።  ኪንዮ ሰብኣዊ መግለጺኡ፥ ገጹ ከም ሓዊ ዝደምቕ ዝነበረን ክብሪ ዝመልኦን እዩ ነይሩ።  ዝፋኑ ካብ ዝኾነ ፍጥረት ዝዓቢ ኮይኑ፥ ብማእለያ ዘይብሎም መላእኽቲ ዝተኸበበ እዩ።  ብፍርሒ ናብ መሬት ወደቕኩ።  እግዚኣብሄር ግና “ሄኖክ ኣይትፍራሕ ተንስእ ኣብ ቅድመይ ደው በል” ኢሉ ተዛረበኒ።

ሊቀ መላእክት ሚካኤል ኣልዒሉ ናይ ክብሪ ክዳውንቲ ከደነኒ።  ካብ ብርሃን ዝደመቐን ካብ ማና ሰማይ (dew) ዝጥዕም ጨና ዘለዎን ቅዱስ ቅብኣት ተቐቢአ።  ስለዚ ነቶም ኣብ ከባቢየይ ዝነበሩ መሰልኩ።

ሽዑ እግዚኣብሄር ፕራቩይል (Pravuil) ንዝተባህለ ሊቀ መላእኽቲ ጸውዖ፡ ንሱ ድማ ጥበብ ዝመልአ ነበረ።  ፕራቩይል መጻሕፍትን ንጽሑፍ ዝኸውን ቃንጫን ሒዙ መጸ።  ምስጢራት ሰማይ፡ ምድሪ፡ ባሕርታት፡ ከዋኽብቲ፡ ጸሓይ፡ ወርሒ፡ ወቕትታት፡ ንፋሳት፡ መላእኽቲ፡ ህይወት ሰብ ምሂሩኒ።  ኩሉ ክጽሕፎ ኣዘዘኒ።  ን30 መዓልትን 30 ለይትን ብዘይ ዕረፍቲ ጽሒፈ፡ 366 መጻሕፍቲ ድማ ወዲአ።

ጎይታ ድማ ከምዚ በለኒ፥ “ሄኖክ ንመላእኽተይ እውን ከይተረፈ ዘይገለጽክዎ ምስጢር ገሊጸልካ ኣለኹ፡ ቅድሚ ፍጥረት ኣነ በይነይ እየ ነይረ፡ እታ እትርአ ዓለም ካብ ዘይርአ እየ ፈጢረያ፡ ንዅሉ ብፍቓደይ እየ ፈጢረዮ።”

በዚ ድማ እቲ ብዓሰርተ ሰማያት ዝገበርክዎ ጉዕዞ ኣብ መወዳእታ በጽሐ።  ስርዓት ፍጥረት፡ ፍርዲ ዓመጽቲ፡ ዓስቢ ጻድቃን ርእየ።  እቲ መልእኽቲ ንጹር እዩ። ኣምላኽ፥ ገዛኢ ናይ ኩሉ ኣብ ሰማይን ምድርን ዘሎ እዩ።

ሄኖክ ነዚ ራእያት እዚ፥ ንርእሱ ጥራይ ዘይኮነስ፥ ንዅሉ ወለዶታት ኪምዝግቦ እዩ ተመሪጹ።  ቃላቱ፥ መጠንቀቕታን ተስፋን፡ ከምኡ’ውን ሓቅነት ፍትሕን ክብርን ናይ ኣምላኽ ዘርኢ እዩ።  እቲ ሕቶ ንዓና እዩ፥ ብጽድቂ ክንመላለስን ነቲ ዘለኣለማዊ መንግስቲ ክንዳሎን ዲና ወይስ ነቲ ካብ ሰማይ ዝተዋህበ መልእኽቲ ሸለል ክንብሎ?

መጽሓፍ ሄኖክ ግርማ እግዚኣብሔር፣ ፍትሑን ዘለኣለማዊ መደቡን የርእየና።  ግዜና ምስ ኣኸለ ንሕና እውን ከም ሄኖክ ኣብ ቅድሚ ዝፋኑ ብኽብሪ ደው ክንብል ምእንታን፡ ኣምላኽ ብጸግኡ ይሓግዘና።